ربط فيزا ايزي باي ببايبال، وسحب 500$ عن طريق فيزا البريد المصري EasyPay Payball
تجربتي لسحب 500$ من باي بال بواسطة فيزا البريد (ايزي باي)،تفعيل فيزا ايزي باي طريقة ربط فيزا ايزي باي ببايبال، وتفاصيل سحب 500 دولار من بايبال عن طريق
تجربتي لسحب 500$ من باي بال بواسطة فيزا البريد (ايزي باي)،تفعيل فيزا ايزي باي
طريقة ربط فيزا ايزي باي ببايبال، وتفاصيل سحب 500 دولار من بايبال عن طريق فيزا ايزي باي فيزا البريد المصري Easy Pay Payball
التدوينة دي فيها كل التفاصيل عن كيفية سحب فلوسك من الباي بال بواسطة فيزا ايزي باي من البريد (أفضل حل للسحب حاليًا)! وطريقة تفعيل تفعيل فيزا ايزي بايمن أول ماتشتريها لحد ماتستلم الفلوس كاش في ايدك عن تجربة… بسم الله :”
استخراج بطاقة ايزي باي من مكتب البريد المصري
أول حاجة بتروح أي مكتب بريد قريب منك ويفضل يكون المكتب الرئيسي، لو مش عارف مكانه خش على جوجل واكتب “مكتب البريد الرئيسي في (اسم المنطقة بتاعتك)” هيطلعلك العنوان على جوجل.
هتاخد معاك
صورتين من بطاقة الرقم القومي.
و25 جنية.
وهتملى البيانات مع الموظف وتخلصها، وهتاخد الفيزا وانت واقف.
اتصل وانت واقف بـ 16789 من موبايلك واختار تفعيل البطاقة واللي هيرد عليك هياخد منك شوية بيانات من الفيزا والبطاقة وهيقولك تم تفعيلها (ممكن متتصلش والموظف اللي ادهالك يفعلهالك على حسب المكتب وروقان الموظف).المهم بعد ماتفعلها هتقف من 15 – 30 دقيقة لحد ما التفعيل يتأكد (ممكن تخش تتأكد من أي شباك هي اتفعلت ولا لسا)
وبعد كدا هتخش الفرع تاني تسأل عن مكنة pos عشان تعمل ايداع، وهتودع 100 جنية عشان تفعيل باي بال (باي بال بيخصم حوالي 40 جنية ويبعت بيهم الكود بتاع تفعيل الفيزا عليه، لكن مش هينفع تودع 40 جنية بس بتاعت تفعيله، لأن أقل مبلغ ابداع لفيزا ايزي باي هو 100 جنية) فهتودعهم.
تسجيل حساب بايبال وربط بطاقة البريد المصري بالبايبال
بعدين تروح البيت تعمل أكونت باي بال من هنا (لو معندكش حساب):
وتخليه باسمك الحقيقي بالانجليزي وياريت يكون الأول والأخير مش الأول والأب عشان ميحصلش مشاكل في السحب أحيانًا.وتملى باقي بيانات التسجيل في باي بال وبعدين تفعله أول مرة من الرسالة اللي هتجيلك على ايميل الياهوو أو الجيميل اللي عملت بيه باي بال.
وتضيف فيزا ايزي باي علي حسابك في باي بال وده بإنك تروح علي Payments وبعدين تعمل Link A Card :
وبعدين تفعل بطاقة ايزي باي علي حساب بايبال بأنك تدخل:
رقم الفيزا “16 رقم موجودين في الوش اللي عليه مسجد”.
وتاريخ انتهائها “بيكون موجود تحت رقم الفيزا”.
والـ 3 ارقام بتوع الـ ccv “بيكون موجود علي الوش التاني في خلفية بيضه”.
في مكان أضافة البطاقات في باي بال.
وبعد ماتتربط وتلاقيها ظهرت في أكونتك هتضغط عليها وبعدين تضغط على Confirm Card وتأكد التفعيل، هيقولك تم خصم مبلغ صغير واحد ونص يورو اللي هو تقريبا 35 جنية.
هتستني نص ساعة بالكتير من بعد مافعلتها، وهتكلم البريد تاني من التليفون أو الخط الأرضي (أرقامهم 16789 و0235315900 والأخير دا اتصلت بيه عالأرضي عادي) وتقولهم انك عايز الـ PP كود بتاع آخر معاملة.
بيظهر عالشكل دا عندهم PP*1234CODE هو دا الكود بتاع التفعيل اللي انت عايزه بيببقى مكان الـ 1234 دي!
هتاخده منهم ولو قالوا “مظهرش لسا عندنا” قولهم راجعوا آخر معاملة بس عندي وزن عليهم شوية، لو فضلوا يقولوا مظهرش مظهرش مع انه بينزل في وقتها… اتصل بليل او تاني يوم وخلاص.المهم بعد ماتجيبه منهم هترجع لباي بال تضغط عالبطاقة اللي ربطتها وتضغط تفعيل تاني وهتلاقي مكان ظهر عشان تحط فيه الكود دا، هتضيفه وتضغط تأكيد وكدا خلاص حسابك بقا متفعل.
بالنسبة للمبلغ اللي خصموه منك (ال35 جنية بتوع التفعيل) باي بال بيرجعهم خلال 24 ساعة من التفعيل بس هيظهروا بعدها من 3 – 7 ايام عالفيزا بالكتير يعني ال100 جنية هترجع تاني زي ماهي بس هتبقى ناقصة اتنين جنية تقريبا.
تأكيد خاصية السحب والاستلام في حساب بايبال
وحاجة أخيرة بعد ماتدخل الكود وتفعل أكونتك خش على “Contact Us” أو “أتصل بنا” هتلاقيها تحت كدا في صفحة حسابك على باي بالوبعدين اختار “Message Center” أو “مركز الرسائل” وبعدين اختار “Compose” أو “كتابة رسالة” تقريبا.
هيحولك على صفحة مراسلة الدعم فهتختار اي موضوع له علاقة بالسحب اي حاجة مش مهم، بس في خانة الرسالة هتكتبلهم:
Hi, I’ve linked my VISA card & confirmed it with the 4-digit code I received on my card statement, now I’d like to start receiving money on my PayPal account, so can you please confirm that my account is in good standing and is capable of receiving and withdrawing money? Thanks.
دا عشان تتأكد انهم فعللولك خاصية السحب والاستلام على اكونتك لأن ساعات لازم يعملوها يدوي مش بتتفعل تلقائي من عندهم…
هيردوا عليك بعدها بيوم يقولك حسابك دلوقتي في أحسن وضع ويقدر يستلم أموال ويسحب عالفيزا وكله تمام.بالنسبة بقا للسحب فلما تسحب عالفيزا هيفضل قيد الانتظار “Pending” في باي بال مدة 24 ساعة وممكن توصل حتى 72 ساعة يعني 3 أيام لو انت ساحب في فترة زمنية فيها يوم خميس او جمعة…
المهم بعدهم هيظهر Completed وكدا اكتمل من طرف باي بال، هياخد بقا من 2 – 4 ايام كمان عشان يظهر على الفيزا، يعني متوسط عملية السحب كلها بيبقى 3 – 7 أيام بحساب الاجازات اللي هي جمعة وسبت، فمتتخضش لما تلاقيها اكتملت في باي بال ولسا مظهرتش عالفيزا لأنها بتاخد وقت زيادة على ماتظهر.
(حصل تعديل في النقطة دي واتلغت) xxxxx باي بال بيخصم 5$ عمولة على أي مبلغ مهما كان حجمه ولكن ال5$ دي بتقدر ترجعها لو سحبت خلال ال4 أيام الأولى من الشهر من يوم 1 – 4 يعني (أضمن وقت)، بتكلم الدعم وتطلب منهم يرجعوا ال5$ رسوم التحويل لأنها بتبقى مجانية مرة واحدة في الشهر.
فيه ناس اليومين دول جربت تسحب في منتصف الشهر وآخره ورجعوا ال5$ برضو عادي بس انا جربت اعمل كدا من فترة حوالي سنة رفضوا وقالولي لازم أول الشهر بس شكلهم غيروا نظامهم وبقوا يرجعوا المبلغ في اي يوم حاليا… ودي الرسالة اللي بكتبهالهم عشان أرجع المبلغ لو حد محتاجها
I’d like to get the 5$ fees that were deducted from my withdrawal back. Auto withdrawal isn’t working in Egypt, so I withdrew my money manually.Can you please return the fees as I’m allowed to withdraw the money once a month without paying any fees.I’m willing to hear an answer from you soon. Thanks” xxxx (اتلغت)
السحب التلقائي لبايبال في مصر، وتجربة سحب 500$.
تعديل: بالنسبة للسحب باي بال من بداية شهر 6 فعل السحب التلقائي لكل الحسابات المصرية، يعني خلاص اي مبلغ في حسابك هيتبعت عالفيزا اللي متفعل عليها السحب التلقائي في حسابك.تقريبا من كتر مالناس بعتوا نفس الرسالة بتاعت ال5$ للدعم اللي كان مكتوب فيها “Auto withdrawal isn’t working in Egypt”
من كتر ما اتكررت عندهم صعدوا المشكلة وفعلوا السحب التلقائي لمصر كلها :”لو فضلنا نزن عليهم على كل مشكلة كدا لحد مايحلوها!
خلاصة القول فلوسك هتتسحب اول كل شهر تلقائي مجانا بدون رسوم، واي سحب يدوي هتعمله تاني طول الشهر هيتخصم منك 5$ ومبقاش فيه حاجة اسمها تكلمهم ترجعها خلاص بما ان السحب التلقائي اشتغل.
الحد الاقصي للسحب من باي بال الي فيزا البريد المصري EasyPay.
بالنسبة لحدود سحب الفلوس من باي بال للفيزا فمفيش أي حد للسحب (مش زي مامكتوب عليها ان الحد الاقصى 5000 جنية في اليوم و20 الف في الشهر، لأ اللي مكتوب في الورقة اللي معاها دا الحد الأقصى للايداع اليدوي في اليوم انما باي بال بيتعاملوا معاها على انها حوالة عادي وبتوصل كلها).تم تجربة سحب لحد 1000$ في سحبة واحدة ووصلوا عادي.
لكن السحب الكاش بيبقى له حدود من الatm يعني آخرك 3000 جنية في اليوم وبيتسحبوا على مرتين كمان لأن المكنة مش بتطلع أكتر من 2000 جنية في المرة للفيزا دي. فهتسحب 2000 وبعدين 1000 وانت واقف.
السحبة الواحدة بتخصم منك 5 جنية والاستعلام 2 جنية دا من بنك مصر أو الأهلي، البنوك التانية بتزيد أو تقل بعض الجنيهات.
اسحب من اي atm في مصر ماعدا بتوع بنك اسكندرية وبنك HSBC دول مش بيتعاملوا مع البريد.الدولار بيتحول مصري وينزل عالفيزا بسعر البنك المركزي اللي هو تقريبا دلوقتي 17.8 جنية، واللي بيخلي الفيزا دي الأفضل حاليا للسحب من باي بال نظرًا لأنها كدا ملهاش أي رسوم نهائيًا مقارنة برسوم بايونير وبايسيرا وديكسي باي واللي كانوا عاملينه فينا.الفيزا صلاحيتها 5 سنوات وكل سنة لها مصاريف 15 جنية فقط. مبيبقاش عليها اسمك ولا العلامة المربعة دي اللي بتقولك تدخلها ازاي في الatm لكن انت هتدخلها بحيث:شعار VISA يكون تحت عالشمال وشعار البريد المصري يكون فوق عاليمين.
ممكن تسحب وتستعلم عن فلوسك من مكتب البريد من غير ماتدفع اي رسوم استعلام او سحب رسوم بس هتستنى في الطابور شوية حلوين :”وممكن تستعلم عن الرصيد اللي عالفيزا من خدمة العملاء بالرقمين دول (16789 و0235315900) أو المكتب نفسه أو أي atm لأي بنك.
استخدام البطاقة اونلاين
تقدر تشتري بيها اونلاين بما يعادل 10 ألاف جنية في اليوم الواحد في المواقع اللي بتتعامل بالجنية المصري، أو 200 دولار في اليوم الواحد بحد أقصى 1000$ في الشهر للمواقع الأجنبية.مجربتش أتعامل بيها عالفيس كممول فمش عارف تنفع ولا لأ، بس أفتكر اني شوفت حد قال انه جرب ومنفعتش للممول.ملحوظة: بما ان الفيزا فيزا مشتريات وبتشتشغل عالنت فياريت نخلي بالنا منها عشان لو وقعت في ايد حد بيشتري من عالنت وكدا ممكن يخش يضيف بياناتها ويشتري عادي بالرقم والتاريخ والـ ccv اللي في الضهر.فياريت نحافظ عليها او ممكن نشطب الـ ccv اللي في الضهر اللي من 3 ارقام دا خالص بأي دبوس او اي حاجة تخفيه…
زيادة أمان يعني طبعا انت مش مجبر تعمل كدا وأغلب الناس مش بيعملوا كدا بس وجب التنويه…ولو حصل وضاعت – بعد الشر – ياريت تكلم البريد او تروح الفرع فورا توقفها وتسحب اللي فيها…
بس كدا دي كل المعلومات اللي هتحتاجها عن الفيزا دي عشان تسحب وتستلم فلوسك كاش.